Bolalar abdominal jarrohligida multimodal opioid bo‘lmagan og‘riqsizlantirish: xavfsizlik va tiklanish tezligi

Maqsad. Bolalarda abdominal operatsiyalardan so‘ng multimodal opioid bo‘lmagan analgeziya (MBA) va opioid sxemasi ta’sirini taqqoslab, ularning samaradorligi, xavfsizligi va tiklanish tezligini baholash.

Materiallar va usullar. Prospektiv klinik tadqiqotga 131 nafar (5–17 yosh) rejalashtirilgan jarrohlik amaliyotidan o‘tgan bemorlar kiritildi. MBA guruhi (n=101) paratsetamol va ibuprofen oldi, taqqoslash guruhi (n=30) esa morfin qabul qildi. Baholash mezonlariga og‘riq darajasi (Vong-Baker shkalasi), yallig‘lanish biomarkerlari (IL-6, CRP), nojo‘ya ta’sirlar, ekstubatsiyaga qadar vaqt va ota-onalar qoniqishi kiritildi.

Natijalar. MBA guruhida quyidagilar kuzatildi: kamroq og‘riq (0,9±1,2 ga nisbatan 4,2±2,0, p<0,001), qo‘shimcha og‘riqsizlantirishga kamroq ehtiyoj (36% ga nisbatan 81%, p<0,001), minimal nojo‘ya ta’sirlar (ko‘ngil aynishi 5% ga nisbatan 50%), IL-6 va CRP darajalarining pastligi (p<0,01), ekstubatsiyagacha qisqaroq vaqt (42±8 daqiqa ga nisbatan 66±11 daqiqa, p<0,001) va ota-onalar tomonidan yuqori baholangan qoniqish (9,3±0,5 ga nisbatan 7,8±1,1, p<0,01).

Xulosa. MBA usuli og‘riqni samarali kamaytiradi, asoratlar sonini kamaytiradi va tiklanish tezligini oshiradi. Ushbu metod bolalar jarrohligida keng qo‘llash uchun tavsiya etiladi.